19世纪末，“月份牌”开始兴起。起初，洋商们想利用新颖的广告载体招揽更多的生意，但从海外运来的画片无法引起市场关注，只好求助本埠的画家，将带有中国风俗的图画印在年历上，所以“月份牌”的绘画风格是典型的中西合璧。
清朝末年，洋商们侪希望招徕更多个生意，急需利用新颖个广告载体做宣传，但是从海外运来个一眼画片呒没办法引起市场关注；于是，只好“入乡随俗”，求助本埠个画家，拿带有中国民俗风情个图画印辣拉年历浪向，四周精心设计别致个边框，并辣适当个部位描绘商品，再配中西对照年历，当中有戏曲故事、寿星胖娃、古代仕女咾啥。
中外日报馆印的月份牌
后首来，中国个民营企业也采用搿一招，使伊成为别开生面个新年画样式，被市民们称为月份牌。
月份牌邪气快形成取代传统年画个势头。辣拉年头岁尾，上海勿少大报馆侪免费拿伊赠送拨订户，譬如《中外日报》馆印过上头有龙个图案、两边画历史人物形象个月份牌。搿种年历既有实用性又有观赏性，葛咾得到了各界人士个青睐。
杭稚英画的月份牌
辣拉上世纪廿三十年代，月份牌博采中西美术个长处，以时尚风格为基调，题材更加多样化，发展到了鼎盛期；附辣海个年历慢慢个被淡化，上头个图画甚至成为独立个作品。
勿少年轻个画家热衷于描绘新鲜事物，追随时代潮流，穿着时髦个上海摩登女性就成为伊拉表现个主角，连大明星胡蝶、阮玲玉等侪被作为模特上过月份牌。同时，还出现了蛮多精心设计个爱国主义题材作品，譬如《法人求和》《梁夫人桴鼓战金山》《花木兰》《十九路军血战图》咾啥，侪拨了市民们一种激励。
广生行印的月份牌
正因为月份牌具有明显个摩登特质，慢慢成为上海千家万户必备个装饰品，并吸引了交关现代画家参与创作。伊拉侪有一套自家个本事，譬如有个精于中国画，就用勾线加色彩来画仕女月份牌；有个熟悉水彩画，就用水彩来画风景脱人物月份牌。其中，顶重要个代表人物是郑曼陀、杭稚英。
《负儿戏镜》图，郑曼陀绘
郑曼陀结合自家代顾客根据照片画肖像积累个经验，辣拉1914年秋天画了《晚妆图》，首创擦笔水彩画法，就是辣传统线描个基础浪向淡化线条，以炭精粉擦出图像个明暗变化，然后用水彩层层渲染，让伊既像照片又勿是照片，而画中女性面容白里透红、光洁细腻，产生丰润明净个肌肤效果脱仔逼真个衣饰质感。
伊画个时装美女邪气快就风靡整个上海滩，香烟公司、保险公司、印刷厂侪来订画，约稿个定金预收到了几年以后。伊根据客户个要求，陆续画过《杨贵妃出浴图》《四时娇影》《醉折花枝》《舞会》《在海轮上》等一大批描绘历史人物跟摩登女性生活个作品。
民国第一美女胡蝶月份牌
杭稚英开过“稚英画室”，并且多方面吸取新个绘画技巧。伊既善于虚心向行家求教，又从海外商品广告跟华脱·狄斯耐个卡通片当中吸收运用色彩个长处，使自家个作品细腻柔和、艳丽多姿。
民国月份牌上的妩媚女郎
搿位画家个作品流行上海30年，伊设计个月份牌超过1600种，代表作有《娇妻爱子图》《吹笛仕女图》咾啥；伊还擅长广告、商标跟商品包装设计，参与个作品涵盖烟草、啤酒、化妆品等，譬如“美丽牌香烟”、“双妹牌花露水”、“雅霜”、“蝶霜”、“白猫花布”、“阴丹士林布染料”、“杏花楼嫦娥奔月月饼盒”咾啥家喻户晓。
抗战爆发后，由于政局动荡、经济萧条，月份牌开始走下坡路。到仔今朝，大家只能辣收藏机构里向欣赏搿种兼有年画功能个艺术品了。
德记全栈大药房广告画，金梅生绘
特别声明：以上内容(如有图片或视频亦包括在内)为自媒体平台“网易号”用户上传并发布，本平台仅提供信息存储服务。
Notice: The content above (including the pictures and videos if any) is uploaded and posted by a user of NetEase Hao, which is a social media platform and only provides information storage services.
