福建
TVB小花何其多，要彈起真係唔容易，不過有時就係一套劇、一個角色、一個場口，然後好好發揮，就會有唔同境遇。
日前喺TVB熱播劇集《香港探秘地圖》中，飾演網絡主播嘅2018年落選港姐黃子桐，就憑住性感造型搶晒鏡。
話說喺劇中，佢嘅角色係一個為咗流量搏到盡嘅主播Maymay，經常著住小背心同熱褲上陣，火紅色、蘋果綠、鮮黃色，每套都sharp醒得嚟又令人印象深刻。
而為咗攞料，劇中佢仲會主動向黎耀祥同丁子朗「發姣」，相當魅惑。
為咗角色有發揮空間，黃子桐話自己完全唔介意性感演出，而網民當然亦都睇得出佢下咗苦功啦。
否則又點能夠引起大家嘅注意，同埋大讚佢身材正呢。
其實唔止劇集，佢平時都會喺社交平台大派福利，例如之前佢就分享咗著住火紅比堅尼企喺泳池邊，有如出水芙蓉般嘅靚相，美好身形盡現眼前。
其他TVB小花例如梁敏巧，見到後即刻留言派心，賴彥妤就搞笑咁問「咁正得唔得」，而網民就一堆稱讚：「真係fit到冇得彈呀」、「火辣辣，要止鼻血了」。
話晒佢都選過港姐，底子肯定有番咁上下，加上平時keep得好，當然得得地啦。
今年30歲嘅黃子桐，2018年參選過港姐，不過12強止步，之後簽咗TVB，可惜星途比較一般。
不過之前佢都飾演過幾個「出位」角色，例如喺《十八年後的終極告白2.0》入面，就有大膽車震戲，而呢場戲當時熱到全身濕透都要繼續拍。
之後佢喺《神耆小子》入面飾演過花痴公關經理、《異空感應》飾演大肚婆小三等等，每個角色都演得有啲層次。
演戲機會唔多，咁唯有向主持方面發展，黃子桐就做過《逝者代言人》、《窺心事》、《奇情谷》等資訊類型節目嘅主持人。
至於話佢係學霸小花，其實佢嘅學歷都幾堅，香港大學中文同犯罪學系畢業，畢業之後仲半工讀，喺香港中文大學醫學院再讀完公共衛生碩士。
之前佢話過曾經放棄去讀哈佛嘅機會，係因為自己有一個演藝夢想，先會揀呢條路。
不過七八年過去，佢揀嘅呢條演藝之路，就並唔係咁好行喇～
雖然演藝事業一般，但黃子桐做生意反而有一手，18歲就開始創業嘅佢，投資過畫室、補習社、身體檢查中心同美容院。
佢曾經自爆獨資60萬開店，自己做老闆娘，而現時仲有中西醫診所，好有生意頭腦。
至於感情方面，黃子桐就自嘲係「渣男磁石」，話以前拍拖一般都唔超過三個月。
曾經遇過中學師兄一腳踏三船，另外喺大學時亦有阿拉伯同學追佢，點知對方只係想娶四個老婆。
入行之後又試過有女朋友或老婆嘅男人隱瞞身份去追佢，每次都係發現之後令佢好傷心。
以前係戀愛腦嘅佢，近年就話自己開始有「消磁抗體」，理性咗好多，好多時都會停一停諗一諗再做決定。
雖然係咁，但佢又好矛盾咁話，依然係鍾意靚仔，最好顏值同人品兼備。
睇嚟戀愛腦呢樣嘢，有時真係天生嘅，戒唔到、搣唔甩～
特别声明：以上内容(如有图片或视频亦包括在内)为自媒体平台“网易号”用户上传并发布，本平台仅提供信息存储服务。
Notice: The content above (including the pictures and videos if any) is uploaded and posted by a user of NetEase Hao, which is a social media platform and only provides information storage services.
