上海闲话｜储有明：“南派”猴戏与齐天舞台

上海京剧院为庆祝建院70周年，由陈少云、史敏、王佩瑜领衔，带仔六台海派京戏晋京汇报演出，让首都个戏迷大呼过瘾。美中勿足个是，戏单里少了郑法祥、盖叫天开创个“南派”猴戏。

虽说京兆名角郝振基、杨小楼、李万春、李少春，演猴戏也斜气结棍，《安天会》《闹天宫》侪是伊拉个拿手好戏。但“北派”猴戏搭“南派”猴戏，辣辣表演个路数浪，交关地方侪勿一样。“北派”讲究神似，舞台浪个气势、威严缺一勿可，一招一式侪像长靠大武生，造型拗得笔挺。“南派”就讲究形似了，演员拿身段收得煞煞小，活脱脱一个猢狲，动作、神态模仿得惟妙惟肖，把猢狲活泼、调皮、诙谐、可爱个个性，演得入木三分。郑法祥打破传统表演程式，创出“含胸、拔背、躬腰”等八项技法。伊演个猢狲戏，拨演艺界尊为“大圣戏”，每一次登台，场子侪坐得满满当当。1926年，郑法祥还受邀去日本演出，红透半边天，伊也是第一个把中国猴戏带上世界舞台个京剧表演艺术家。

郑法祥教学留影

老早上海滩有“三个半滑头模子”个说法，黄楚九就是其中一个。伊开了爿大世界游乐场，脑筋活络得不得了，大世界里个哈哈镜，就是伊第一个想出来个噱头。看到猢狲戏介吃香，黄楚九晓得发财机会来了，就投资辣大世界旁边，专门为郑法祥度身打造了一座新剧场，起名“齐天舞台”，专门演齐天大圣个戏。

齐天舞台1928年落成，硬件是顶顶好个，勿但有机关布景，舞台还会得旋转。郑法祥独挑大梁，一个人、一台戏，辣辣同一个剧场里演了三年多。从《孙悟空出世》演起，一直演到西天取经、历经九九八十一难，足足演了九十几本。一千多场演出，场场爆满，创造了世界舞台演出史浪个奇迹。

郑法祥教学留影

当时上海滩还有一位演猴戏个名角，就是盖叫天。伊唱戏个资格比郑法祥老，但演猴戏出道比郑法祥晏。盖叫天有两个儿子，张翼鹏搭仔张二鹏，也侪会演猴戏。伊拉父子三个加上郑法祥，一起奠定了“南派”猴戏个表演体系。凭《孙悟空三打白骨精》出名个绍剧演员六龄童，还有上海京剧院个“开口跳”陈正柱，侪是“南派”猴戏个传人。

老古话讲得好：“花无百日红，人无千日好。”再好个戏，天天看也要审美疲劳。黄老板看到“大圣戏”勿再像从前搿能介吃香，就把“齐天舞台”改名叫“共舞台”。意思蛮清爽：勿管是啥个戏、啥个演员，只要能赚铜钿，就请过来演，迭只“台”让大家一道来“舞”。

原标题：《上海闲话｜储有明：“南派”猴戏与齐天舞台》

栏目编辑：史佳林

文字编辑：钱卫

本文作者：储有明