43岁袁伟豪努力保养！自认大叔仍不忿网民为流量嘲衰老

袁伟豪（Ben）在《反黑英雄》首度演杀人如麻大反派“陈祖耀”，他演得过瘾，观众亦睇得投入。

不过他的状态再度成话题，他就不忿网民为流量才经常嘲他衰老。他坦认毕竟已年届43岁大叔之龄，加上早年捱坏身子，但已努力保养。升呢人父的他，开心囝囝袁晞祐（乳名：袁咕碌）已识叫“爹爹”，期待等囝囝大点一齐游电单车河，还透露有意追个女。

採访：杜杜 摄影：谭志光 场地:Velo Italian Bar & Grill

Ben对于演大反派，完全不抗拒，还形容“陈祖耀”，“呢条友几型，几劲喎！好爱恨分明，有仇必报，亦都好重情义。”

他选择以踏实方式演绎，更得到认证，“差唔多拍完监制话‘几好睇，有啲嘢喎’，我就觉得呢件事成功咗一半，走啱咗方向，只係观众会点睇，係咪真係会咁肉赤呢？！原来佢吊颈嗰刻啲人都会话‘咁点算冇嘢睇喎’，证明大家代入咗，呢个人係有血有肉。”

拿旧作比较好无谓

Ben近期每逢有剧播，外界着眼点不是演绎，反而更留意他的状态，他坦言觉得好无奈，“梗係会有，点解要咁啫？！成日讲衰唔衰老，又断涯式又旋风式。”

他分析外界拿旧作来比较，认为相当无谓，“点解“天堂哥”（《使徒行者2》）会变成咁？！‘天堂哥’係7年前㗎啦，唔该！《铁马战车》个‘司马sir’ 10年前㗎啦！嗰时33岁，今年小弟已经43岁。

“牙佬”係34岁，係最fit，最当打嘅时间，人生最健康、能量最高，回气回得最快，最襟捱嘅时候，嗰时仲要高清，现在係睇紧4K、8K，同期我又拍紧两个剧，又做咗人爸爸，个样少不免有啲残，现场环境又恶劣，个妆甩得快啲，咪又见到我更加攰囉！”他又笑言已自称uncle，“成班世姪，都係叫我Uncle Ben，家我觉得大叔好型，冇贬意！”

Ben强调不会为这些声音，放弃搜寻有关自己工作的消息，更会忍不住出手澄清，“佢想要流量，做啲话题出嚟，唔係啲正常人嘅用户，而我见佢有啲嘢想做，咪回应佢其实我唔係肥，喺我工作生涯裹面，我应该冇肥过，未试过有肚腩。”

他最不忿是网民一句话，随时变成新闻，“你话我残都算，仲要话埋我有肚腩，我日日饭都冇得食，就係为咗个角色想fit啲动作打得快，你一句话我有肚腩，我又畀啲传媒讲话我走样有肚腩，咁係咪先，所以我咪话畀佢听唔係肚腩嚟，係腹肌嚟！”

调整作息努力保养

Ben坦认身体早已捱坏，更笑言每日状况有“最佳食用期”，所以工作前要提早起身去水肿，“今日做6个专访，正午12点开始，我要7点起身就係要等自己醒，碌面，就算碌完都係肿到乜咁，都要碌㗎嘛！咪就係年纪大囉，捱坏咗啲内分泌。”

他亦好注意饮食，以少甜少盐为主，“总之少盐係大前题，唔食宵夜，唔食甜，因为糖化衰老得好快，一定要做运动，跑步同埋做gym，但冇之前个强度咁犀利，以前我会跑10K，家跑5K鬆啲就收手，惊跑得太多甩水太劲又会攰。”

为了保养兼凑囝囝，Ben更调整了作息时间，“我平均夜晚12点半度就瞓，以前係3、4点都唔瞓，家唔使开工我都会咁早瞓，尽量7、8点就起身，上午去做运动，晨操完返嚟就去凑BB，陪吓屋企人，夜晚就cut应酬，食饭7点食到10点返屋企，唔会玩到好夜，靠呢啲嚟保养。”

计划为囝囝追个妹

讲到升呢人父，Ben坦认责任大了，连揸快车都会有内疚感，“上年（张）宝儿陀咗 3、4个月，啱啱公佈咗有BB，我同振朗去咗欧洲拍《欧洲铁骑游》，我喺德国嗰条冇限速公路揸到200几公里，揸住电单车爽㗎！

听见啲引擎声，又有啲风，见到个表180、200、220咁上，完成咗嗰个速度好正，但係之后嗰几秒就觉得好内疚，即刻就谂我嗰吓炒车，我个人就散，BB点呢？！都未见到我，我就唔喺度咁点算呢？！觉得有啲嘢，唔使去到咁尽，年少时试过呢啲嘢就算嘞！”

Ben提到袁咕碌就冧晒，开心透露听到囝囝识叫“爹爹”一刻劲兴奋，更期待等囝囝大点一齐坐电单车。他又计划2、3年后为袁咕碌追个妹妹。