《利玛窦》三度公演 刘松仁拒再接戏 将下半生交畀王梓轩

刘松仁2019年首次为音乐剧《利玛窦》执导，他形容当时“乜都唔识”，但受相识60载的神父恩保德（Giampietro）所托，硬着头皮接受“任务”。至今《利玛窦》演出共20场，今年4月将于香港文化中心三度公演，由剧本、演员、音乐、舞台设计及服装等等，均由松哥亲自育成，他扬言：“我摆晒我自己落去，我行紧最后嘅阶段，里面其中一个就係《利玛窦》。”

日前，松哥以导演身分联同男主角王梓轩受访，是次三度公演更加入数十人管弦大乐队及100位中学生参与演出，梓轩说：“自从上两次公演之后，我哋有机会同唔同学校交流，松哥趁今次畀多啲学习嘅机会佢哋，先有呢个合作。”

至于管弦乐部分，松哥坦言向来有这个概念，只因没钱未能成事：“家机缘巧合邀请到现场演奏乐队，我希望观众更加投入，享受成个戏精神。”另外，由于主导音乐剧《利玛窦》的恩神父去年离世，松哥透露将加入纪念环节，大讚对方为香港贡献良多。

问到为何会执导传奇人物利玛窦的音乐剧？松哥笑称“好奇怪”，虽然与恩神父深交多年，但对方从未邀请他任何演出：“佢知道我唔係好做教会嘅嘢，因为我好怕hard-sell。”

10年前，恩神父首次邀请松哥演出舞台剧《流芳济世》，原本已有4齣戏在身的他，根本无暇演出：“点知4部戏都同我讲要延后，咁我冇得推啦，于是就开始第一次同佢合作。5年后，佢叫我做导演，我乜都唔识，好彩有好多人帮我，第一个我就搵梓轩，嗰时乜都未有㗎。”

过程中，松哥专心一致做好准备，从未为身负重任而有压力，他说：“旅途就係你不停咁行，只要你肯行，你就会逢遇，咁你就会一路行落去。”相反被松哥点名做男主角的梓轩却“压力山大”：“松哥初初叫我研究个戏，我荣幸之至，但係松哥叫我演利玛窦，我係好耐都冇答应。好大压力喎，我何得何能？后来就係行咗先，最重要唔係我或者我嘅感受，最重要係件事喺大家心入面有个影响。”

梓轩感激由筹备至演出期间，松哥经常指导他，同时亦令他更相信自己：“如果安排咗大家一齐做，而你觉得自己唔值得，你係嘥咗人哋时间，係唔可以容许呢样嘢。松哥提点我，我係用个好感激嘅心，如果佢唔提我，我就好惊㗎啦，即係冇得进步。”

他更分享过程中最大的得着，遇到问题不应该视之为“障碍”而是“练习”：“有问题，即係你要去解决，呢个係令你向前嘅，但係你当问题係一幅牆嘅话，就会好怯，你会企咗喺度。”

《利玛窦》的旅程的确充满美丽的相遇，先有王梓轩，还有女主角陈洁仪（Kit）。松哥用“得意”形容Kit的加入，他透露原本已经有女主角：“个戏由业馀变咗职业，监制叫我搵个再有份量啲（女主角），我话唔得，人哋喺我最艰难嗰时答应我。”

最后，原定的女主角主动辞演，于是松哥找来邓萃雯：“点知佢话你唔应该搵我，佢就介绍佢好朋友阿Kit。”松哥亲自飞往新加坡与Kit接洽：“讲晒成件事、讲剧情，讲咗几个钟，咁佢去厕所，佢话喺厕所听到首歌，好似有把声话‘你要做呀’，吓到佢即刻应承我，好好笑，我直头觉得係神蹟！”

剧中梓轩要从20多岁的利玛窦，一直演至50多岁，期间涉及多个造型的变化，最令观众惊喜的，是梓轩从未离开舞台，但却在短时间内转换多个造型。两人笑住表示是他们的magic（魔法）。谈到排练过程，梓轩指松哥每次都加入一同练习，即使还未正式綵排：“嗰啲即兴练习都好，所有嘢松哥都一齐玩，嗰刻有冇剧本都好，成个团队就已经喺度。”

松哥坦言非常享受创作与排练的过程：“真係好有力量，我哋演电视，係透过电视打入观众个心入面，影响你，舞台剧係成班一齐影响啲观众，好一致，好强劲嘅能量。每次我都睇到喊，唔知点解好感动。”

虽然如此，松哥却从未想过参演其中：“我淨係想做观众，我唔锺意演戏㗎，讲出嚟都好笑，我唔係享受演戏嗰啲人嚟。（但你演咗40年喎？）係呀，唔通唔使食咩？”梓轩突然爆小秘密，指《利玛窦》有机会以演唱会形式呈现，届时有“利老窦”（利玛窦爸爸）的角色，至于角色谁属，请大家自行猜想。

梓轩经常称松哥为恩师，但两人的相处更像“好兄弟”，访谈期间有讲有笑而且默契十足，问到松哥是否视梓轩为Buddy？他大笑说：“我唔理呀，我下半生交咗畀佢！”梓轩笑到差点掉在地上。

近年在幕前甚少见到松哥，坦言不会再接戏，只因所有心思摆到《利玛窦》上：“我冇（其他）计划，我摆晒我自己落去，我行紧最后嘅阶段，里面其中一个就係《利玛窦》。”早前传出他身体欠佳，松哥大笑回应：“我嘅状况点，等你哋话畀佢哋听。”

梓轩指松哥的精神力量非常强大：“佢一入间房係好似空气静止咗咁，然后嗰条虚构嘅红地毡就出嚟。”松哥闻言表示，从电视台年代学习到何谓“压场”，又指过去自己太严肃：“后生嗰阵我好严肃，因为好集中谂紧点演点演，直到有次我同陈玉莲拍嘢，佢啱啱相反。佢一入厂‘点呀你哋？’好开心嘅，我嗰时学到嘢。于是，我以后返屋企见到阿妈就要笑，哗，好有力量，我係假（笑）㗎，啲肌肉硬㗎，我唔理我E（E起棚牙），E到我真係有个笑容出嚟，母子关係产生几大变化。以后同人倾偈倾咩都畀个笑容先，迟两秒讲都得㗎，呢样好嘢，唔好睇少笑容。”

松哥对演艺事业如此投入与热爱，是否永不言休？他说：“唔理咩圈，我后生都讲，无论我扫街又好、演戏又好，做咩都好，都係服侍我学习做人，所以喺边个环境都无所谓。”