(原标题:安全劏蟹心得)
白话广州
早嗰排,广州一位阿伯劏蟹嗰时唔小心俾只蟹嘅蟹钳钳伤,后嚟因感染过世。听落几得人惊。
小弟平时都入得下厨房,时不时亦会买下海鲜食,所以,对安全劏蟹有小小心得,宜家同大家分享一下。
广州人食嘅蟹有两种,一种系花蟹,一种系肉蟹。花蟹要浸著海水先至生猛,所以当你买返屋企到劏嗰时,佢因为离开海水太耐,呢个时候基本上已经唔识郁,咁就唔会伤到人。而肉蟹呢,佢唔使海水浸著,“光身”一样可以“手舞足蹈”伤人,尤其佢前面嗰对钳(广州人称为“冈”),俾佢钳到真系可大可小。
劏肉蟹有两种安全劏法:1、松绑前,用筷子对著佢个心口——一插!咁佢就“武功”被废,成只都唔识郁任你摆布;2、松绑前,从后面揿著佢后面嗰几只爪(呢啲爪系冇乜杀伤力嘅),再用铰剪从后面松绑,等佢伸出两只冈时,手起刀落剁咗落嚟,之后再落手“折件”,咁就冇有使惊嘞。
当然,食肉蟹最安全嘅方法,就系唔松绑连埋绳一齐放落个镬原只蒸熟,不过咁就唔可以做出姜葱炒、咖喱煮等口味,并且只能等蒸熟先至可以清除蟹里面嘅冇用内脏同垃圾。
好多海鲜都可以喺买嗰时叫卖鱼佬呢啲“专业人士”帮手劏埋,唯独蟹要自己劏嗰,所以一定要小心。
阿六 律师
(原标题:安全劏蟹心得)