TVB电视城再爆疫情恐慌，继月初开始有多位幕后职员初步确诊后，“声梦学员”潘静文上周于《劲歌》录影前作快速测试时初步确诊，估唔到疫圈已经杀入剧组，有消息指艺员周嘉洛证实初步确诊！
现正为剧集《回归》、《曙光》开工嘅周嘉洛，每日都投入拍摄工作，寻日（23日）同样为《回》开工嘅好友吴伟豪，晒出周嘉洛现身化妆间Set头嘅片段。
见到周嘉洛成个人头耷耷现病态，冇晒精神，疑似已经出现病征。
加上另一好友“风少”陈浚霆亦为周嘉洛及吴伟豪送上药水及连花清瘟胶囊，未知系咪见到好友病病哋，所以赠送药物。
据知TVB现已暂停所有录影厂景，艺人化妆间、多个录影厂亦已进行大消毒及清洁，亦叫所有台前幕后工作人员都接受快速检测，以策安全。
而喺传出周嘉洛确诊消息前，艺人Ronny（黎泽恩）就已经喺社交网爆料，指同剧“有一位艺员确诊了”，并指对方本身已经有病征，佢自己都有同过对方交流，因此佢都急急脚去做检测。不过当东网向Ronny查询确诊者是谁时，佢就即封口唔讲，佢自己就Check咗冇事，而事后佢亦极速Del Post。
至于同剧嘅女主角陈炜亦甫出快速检测包结果，显示为冇感染，又留言：“胆战心惊的一天”，更加落实周嘉洛初步确诊消息。东网致电陈炜询问，佢指周嘉洛系快速测试确诊，今日应该会去做正式检测：“一切都会等佢嘅检测结果，有需要都会配合再做测试。暂时都Touchwood冇确诊，都希望会冇事喇！”而同剧嘅马贯东寻晚亦做足两次快速检测，均显示未有确诊。
周嘉洛同样有份参与拍摄嘅处境剧《爱．回家之开心速递》未知系咪继续开工，见周嘉洛“妈咪”滕丽名晒出自拍照。
她留言指“一班《爱回家》嘅演员及台前幕后工作人员喺疫情嘅高峰期，依然无怨无悔日夜工作，呢个时间为嘅当然唔系搵钱……系使命感……请懂得欣赏我们全体员工的努力我们的坚持。”似乎未受周嘉洛确诊影响。
而在TVB剧集《回归》、《曙光》与周嘉洛饰演父子嘅郭晋安，对于嘉洛“中招”，郭晋安表示：“一个星期前同嘉洛拍过戏，其实拍呢套戏以嚟，自己每朝都会做一次检测，因为屋企有小朋友，所以呢啲钱唔悭得，我哋嘅职业系要除咗口罩开工，所以每日都做检测，万一发现有菌，都嚟得切隔离，希望嘉洛冇事啦。”安仔又赞公司停止所有戏剧组拍摄进行清洁、消毒，反应相当迅速。
特别声明：以上内容(如有图片或视频亦包括在内)为自媒体平台“网易号”用户上传并发布，本平台仅提供信息存储服务。
Notice: The content above (including the pictures and videos if any) is uploaded and posted by a user of NetEase Hao, which is a social media platform and only provides information storage services.
