分享至
（原标题：再逛电脑城）
好耐冇去过电脑城，前一排行经岗顶，入去几个电脑城逛咗下，发现里面真系变晒样：第一印象就系客人少咗，第二印象系逛得舒服咗，事关商场嘅陈列布置亦改善不小，宽松、明亮，唔似之前嘅墟市印象。
所谓“北有中关村，南有石牌村”，早喺十几年前，石牌附近嘅几家电脑城就成行成市，驰名远近。以前四乡啲朋友来广州，都要去电脑城行下，每逢周六日，呢度都人山人海，好似趁墟咁。不过，IT行业变化之快超出想象，家阵电商冲击之下，无论中关村、华强北，定系广州嘅岗顶，面临嘅经营压力都好大。不过，淡静之下嘅电脑城，其实亦隐约可以见到，啲商家八仙过海，各谂计仔寻求突围。唔少铺头本身开咗网店或微店，使店铺本身作为“样板间”或者形象店。仲有新闻话，呢两年唔少电脑城商家试探出口转内销。再者，电脑城嘅产品结构，亦因应市场变通唔少，譬如减少咗组装机，多咗手机、移动互联网嘅零配件之类。
其实，电脑城同其它传统实体店相比，发展嘅道理都系一样，就系注重顾客嘅体验。以前人逼人、脚踩脚嘅墟市式档口，安全隐患唔讲，顾客嘅感受就已经大打折扣。我觉得，改善环境，改进服务，俾人逛得舒服、买得放心，应该系电脑城“突围”嘅过程中，需要考虑嘅第一点。
闻歌 媒体人
(原标题：再逛电脑城)
本文来源：大洋网-信息时报
责任编辑：
王晓易_NE0011
