上海
鲁迅先生年轻辰光到日本学医。伊最初想学成回国，治病救人。后来，伊辣在日本看了一部电影，伊个人生规划就大转弯了。
搿部电影是讲日俄战争个，当时日本和俄国辣中国东北地区打仗，日本兵抓了一个中国人，讲伊是俄军奸细，就拿伊枪杀了。围观个中国人却麻木不仁，无动于衷。鲁迅先生从搿部电影里想通一个道理——唤起中国人个国民精神比救性命更急、更重要，因此决心弃医从文。搿能一来，中国少了一个“鲁大夫”,多了一位思想家和文坛斗士！
从《鲁迅日记》晓得，鲁迅先生一生看过个电影超过150部，尤其最后十年住辣上海虹口山阴路大陆新村个辰光，跟虹口隔河相望个博物院路21号（现虎丘路145号）底层有一家光陆大戏院，1949年后叫“曙光剧场”，1928年12月到1936年4月，鲁迅先生辣搿搭看了几十部电影。常常是儿子海婴困着了，鲁迅写作告一段落，就跟许广平一道去电影院。有辰光，鲁迅也会带儿子去看进口动画片，像《米老鼠》咾啥。伊还跟柔石、周建人、真吾、许广平一道看过电影《续三剑客》。
上海音乐厅个前身是南京大戏院，当时经常放外国新片。鲁迅最后两年，至少辣搿搭看了十部外国首映新片，比如《民族精神》《寻子伏虎记》等。
黄浦剧场个前身是金城大戏院。《鲁迅日记》里向写道，鲁迅跟许广平至少两次到金城大戏院看电影。1934年3月22日看《兽王历险记》。11月14日看《海底探险》，搿天鲁迅体温38.3摄氏度，辣辣发寒热。鲁迅斜气欢喜看科学探险片，第二年11月13日下午，伊又带儿子去卡尔登大戏院（后来改名长江剧场）再看《海底探险》。当天傍晚，伊又去金城大戏院看左翼人士演个根据果戈理剧本改编个《钦差大臣》，伊辣生命个最后阶段仍旧用行动支持左翼文化和戏剧运动。
原标题：《上海闲话 | 储有明：鲁迅先生观影往事》
栏目编辑：史佳林 文字编辑：蔡瑾
约稿编辑：钱卫
来源：作者：储有明
特别声明：以上内容(如有图片或视频亦包括在内)为自媒体平台“网易号”用户上传并发布，本平台仅提供信息存储服务。
Notice: The content above (including the pictures and videos if any) is uploaded and posted by a user of NetEase Hao, which is a social media platform and only provides information storage services.
