分享至
（原标题：最后嘅戏服厂）
白话广州
好多人都中意逛上下九，一个原因系嗰度商业繁华，可以尽情买买买，另外一个原因系嗰度有好多历史悠久嘅建筑，比如骑楼、老字号店铺。仲有其他非物质文化遗产。
但系，据新闻讲，状元坊最后一间戏服厂因为交唔起铺租而面临关停。呢间戏服厂负责人今年曾用视频嘅方式向越秀区领导反映问题，冇得到回复，日前又通过电话连线嘅方式再次反映问题，终于得到回复。嗰位区领导话，唔会俾最后一间戏服厂喺自己任内关门。
我记得喺人民南路，距离状元坊牌坊冇几远嘅临街店铺中就有一家戏服店，专门卖人工制造嘅粤剧戏服。呢家店唔大，望落去好旧，对比其他临街店铺，显得冷冷清清，唔知系咪呢间戏服厂开嘅。可以睇得出，粤剧戏服真系冇乜嘢生意。其实也唔出奇，戏曲文化式微，戏服厂嘅经营又好得到边呢？
好似戏服厂咁样嘅非遗项目，广东仲有好多，比如广绣、剪纸、皮影戏……经常有专家呼吁保护和推广非遗，相关部门也有回应和努力，但似乎努力得唔够，好多非遗项目都面临无人肯学传承难嘅问题。讲返戏服，呢种市场非常小嘅项目肯定也会遇到咁嘅问题。不过，戏服厂因为状元坊铺租贵而经营唔下去，咁系咪可以搬去第度呢？唔一定要喺状元坊咁贵嘅商业区开嘅嘛！ 陈嫚 职员
(原标题：最后嘅戏服厂)
本文来源：大洋网-信息时报
责任编辑：
王晓易_NE0011
