(原标题:开台过日辰)
“六婶三太公,大众开台喇面似莲蓉……”“歌神”许冠杰呢首同“麻雀”有关嘅《打雀英雄传》真系作得好盏鬼,麻将台上边嘅各种赌态俾佢写到绝晒。
有人唔中意麻将,认为中意打麻将嘅人烂赌兼游手好闲。不过,最近广州有班大学生就公然喺课室里边“开台”,学校仲冇意见。呢班大学生打嘅唔系广州人平时打嘅“上牌”“杠牌”,而系高规格嘅竞技麻将。平时大家喺棋牌室见惯嗰啲吞云吐雾、粗口乱飞、大呼小叫嘅混乱场面全部都唔会出现,而且仲多好多规矩。广州人话“麻将台上睇人品”,呢班学生嘅“牌品”就真系“湿水棉花——冇得弹”喇。
广州人中意打麻将,隔离左右楼上楼下,只要揾齐四个人,开一张台,呢项活动就可以开展。嗌一句“开台咯”,马上就有人响应。不过大家可能唔知,其实唔少粤语俗语都来自麻将术语。好似“西风起糊,恶过老虎”,讲嘅就系最后关头发力先系取胜之道,有“好戏在后头”嘅意思;而“四万咁嘅口”,就系用来形容一个人嘅笑容,笑到好似四万咁样。
其实,大家无需歧视麻将,毕竟每一项活动都有利有弊。好多街坊打麻将,其实唔系为咗赌博,只不过系打发下时间,过下日辰。如果竞技麻将可以推广,我谂会有好多人捧场,毕竟呢项活动有群众基础嘛。
李月婷 媒体人
(原标题:开台过日辰)