马贯东夺“男飞跃”自爆仍靠阿妈接济！入行18年历尽辛酸曾被掟剧本

马贯东夺“男飞跃”自爆仍靠阿妈接济 入行18年历尽辛酸曾被掟剧本

曾被人掟剧本侮辱，37岁的马贯东（Mark）终于吐气扬眉，开斋首夺TVB台庆颁奖礼“男飞跃”奖。Mark 捱足18年，10年前曾被误会是电视台道具工，自爆今时今日母亲仍然久不久塞钱畀佢，即仍要靠屋企财政支援。

得奖要特别多谢“救命恩人”杨茜尧，也希望令长期担忧他的妈妈增加安全感。

採访：方骞平 摄影：朱伟彦

马贯东嘅剧作《新闻女王》、《妳不是她》、《旁观者》于颁奖礼前夕陆续推出，令他佔尽优势，撼赢眼中头号竞敌阮浩棕、孔德贤成为最资深“男飞跃”得主。他自言要一步一步打好根基，希望3年内成为“男配”；

终极目标係“最佳男主角”：“钱家乐话过‘望住4座位座驾永远揸唔到法拉利’，所以做人目标要高，但抱住平常心。”

凭单眼皮杀出血路

Mark入行18年，直至8年前的《铁马战车》才有机会学习基本功；至于拍《爱·回家之八时入席》从毛舜筠及黎耀祥身上获益良多；

而《那些我爱过的人》演患有亚氏保加症医生，第一次感受到演员嘅使命感，原来有责任带出正确资讯畀观众，亚氏保加症病者唔係低智商；

去到《破毒强人》的“杜飞”係另一个层面，从未接触过有故事嘅大反派：“原来监制Marco睇中我单眼皮，同埋唔係好出声呢个特质，最啱做意想不到嘅杀手，哈！第一次觉得原来单眼皮对演出係有帮助。”

杨茜尧借剧本解围

Mark唔认为自己的事业是迟来的春天，反而觉得时间啱啱好，机会太早反而未必懂得珍惜，还爆出初入行时被杨茜尧“营救”经历：“年轻时都係行行企企(做茄喱啡)，嫌个角色冇乜发挥，有次冇睇剧本返工，排位时先知原来係有句对白，要交代啲重要嘢，当时杀我一个措手不及。

好彩身边嘅杨怡(杨茜尧)队份剧本过嚟帮我解围，事后都知衰马上道歉，自此变得专业，唔敢唔睇剧本。不过，阿怡嘅窝心举动好深刻，最近再合作拍《黑色月光》旧事重提，但佢都冇乜印象。”

被掟剧本若无其事

提到辛酸史，曾被演员掟剧本的Mark冇放上心：“事后谂返自己都冇做错，当时未开机，拎住剧本好正常，只係佢唔锺意…(演员係咪燥底？)唔评论，事发时场内个个都呆晒，我同其他人当作若无其事，即使家见到面大家扮唔记得，仲有偈倾。”

他唔嬲还自我安慰：“算啦…只係反映佢嘅人格，唔会影响到我，可能佢嗰期唔开心呢！呢个係入行以嚟最愕然嘅经历，一个人喺公司18年，冇可能係一帆风顺嘅。”

Mark认为入行头10年“什麽也不是”的阶段最艰辛，较半红不黑嘅奀星还要奀：“记得有次睇医生，医院有病人搲水吹问我做乜职业？我答做电视台，对方追问係咪做道具工？我唔想多讲就答係。

虽然家多人认识咗，行街会有观众眼望望叫我‘博士’、‘杜飞’，但妈妈Keep住好担心我将来，成日问‘点呀？够唔够钱使？会唔会好辛苦？’佢每次返港，甚至会收埋啲钱喺衣柜暗角stand by，久不久提示我唔够就去‘安全仓’拎钱。”

Mark希望奖项可以令妈妈有安全感：“最开心见到妈妈开心，佢睇到网民留言话得奖实至名归，会比我更开心。”在单亲家庭成长嘅Mark，是朋友眼中的“裙脚仔”，他冇否认还笑说：“咁都ok嘅，至少冇行差踏错。”