吃貨必看！雀仔園街市恢復營業，「老字號搵食攻略」來襲！

我唔允許仲有人唔知

1月9日起，雀仔園街市恢復營業啦！

對於資深吃貨而言

最最最令人心掛掛嘅

莫過於雀仔園嘅美食

澳門的美食無數，最貼地嘅美食仲係街市美食！一邊同街坊談天說地，一邊大飽口福，食嘅就係哩種人間煙火氣。

自從雀仔園開翻之後， 好多街坊同熟客仔都表示佢哋係專登過嚟“尋味”。佢哋話始終都係覺得街市抵食就腳，大家食咗幾十年，又啱嘴型可以吹下水。

目前哩邊恢復運營嘅餐飲檔口唔算多，但全部都係經典老字號。好多老細事頭婆都上咗年紀，紛紛表示再做多幾年就退休嘆人世，食少見少啦，快啲緊跟為食妹嘅腳步嚟逐間攻略~

01

志圖粥麵

志圖最出名嘅就係布拉腸同生滾粥，必須都點上一份！

宜家布拉腸都唔多見啦，今日就來找回童年嘅味道。腸粉講唔上話好薄皮，勝在米漿都係老闆自己每日現磨，食得出米香味，有布拉腸特有的韌性。

生滾艇仔粥更係可圈可點，粥滾到又綿又滑。海量的配料，再加上一把錦上添花的花生，每一羹都鮮到入心入肺。

02

成記腸粉

而隔離嘅成記食嘅又係另外一種腸粉，主營自家手工製腸粉、各式糕點、豆粽。

而必食嘅就係燒賣腸，一份細燒賣腸有兩粒大大舊魚蓉燒麥，皮夠曬薄肉又夠大，好多街坊都會點一份斎燒麥食個夠！而腸粉都好滑，讚讚讚！

無敵碳水組合必須要加多一隻粽，哩度嘅粽係綠豆肥豬肉粽，一啖咬落去可以食到滿滿嘅綠豆蓉，肥豬肉嘅比例唔會太多，為食妹超愛！

03

陳記美食

陳記美食就專門做各種粉麵，雀仔園嘅人氣王非佢莫屬，一到飯點就要同各位公公婆婆一齊排隊等出餐。

識食就一定要試下佢哋嘅雲吞撈粗加腩汁，雲吞皮薄到一夾就穿，真係皮薄餡靚。腩汁鹹香惹味，撈粗簡直一流~

04

成記糖水

為食妹一直都好好奇成記腸粉同成記糖水有咩淵源，原來佢哋唔係同一家人，但係係街坊+好朋友嘅關係，大家都係第二代傳人，由細玩到大~

溫馨提示一下大家，成記糖水大概會係12:30-13:00之間開檔。其它檔口一般都係做早市，而佢哋係做下午，過嚟覓食記得要睇準時間，千奇唔好摸門釘呀。

糖水嘅均價一般15蚊上下，選擇都幾多下。為食妹試咗腐竹薏米同陳皮綠豆沙都覺得唔錯，煲得夠滑又足料，唔會太甜~

05

隆記

隆記主要係飲嘢都食包、多士之類為主，簡簡單單點杯嘢飲，點個包食，係哩度嘆下下午茶，都幾愜意。

除咗雀仔園街市嘅美食街

哩度附近仲有好多有情懷嘅老店

值得探尋我哋慢慢探尋

哩度老字號保留的不只是嗰份味道

更是那份埋藏在深處嘅回憶

· 今日作者 ·

[ 圖文 · 頗醬醬 ]

[ 攝影 · COISINI ]

00：19/09：26

點分享

點收藏

點點讚

點在看