分享至
（原标题：佢哋叫嘉欣）
白话广州
如果你喺街度，大声嗌一声“嘉欣”，可能会有成群靓女响应喔！原来，据公安部门统计，广东人最常用嘅名中，“嘉欣”排第一。呢个名咁受大家欢迎，除咗令人联想到某个大明星，又或者联想到“加人工”之外，到底仲有咩原因呢？
之前，有几个朋友帮仔女起名，佢哋共同嘅要求，一系意头好，二喺叫得响，尤其喺用广州话读得响亮。嘉、欣两个字，都符合要求。喺份TOP100排行榜上，除咗嘉欣，仲有家欣、嘉慧、嘉丽、嘉文、嘉豪、嘉琪、凯欣、颖欣、咏欣等，涉及两个字或佢嘅同音字嘅，至少占咗一两成，可见广东人对呢两个字嘅欢喜。据说，唔同地方嘅人起名中意嘅字，有明显嘅唔同，譬如话江苏人中意用“英”字，陕西人中意用“剑”，上海人中意用“宝”。有啲名，一听就知道唔系广东人，原因就系佢用白话读有唔同嘅谐音，而且唔够响亮。
话时话，广东人嘅流行名亦一样会跟住时代而变，避免重名成咗第三种要求。譬如话以前流行嘅伟强、国雄，家阵啲细路已经好少用。相比之下，“睿”、“赟”之类以前少用嘅字，如今就几流行。不过计我话，帮细路起名仲系少啲用溜愣嘅字，费事到时俾佢增添不必要嘅麻烦，譬如朋友甚至老师唔识读，或者太繁琐，签个名要俾人哋用多几十秒。
闻歌 媒体人
本文来源：信息时报
责任编辑：
王晓易_NE0011
