分享至
（原标题：湿水棉花）
白话广州
“呢碟蒸排骨爽滑可口，真系湿水棉花，冇得弹！”喺酒楼饮茶，隔离台嘅阿伯对佢嘅朋友夸赞话。广州话嘅俗语“湿水棉花，冇得弹”，意思话，浸湿咗嘅棉花弹唔松，引申为某样嘢几乎完美，无可挑剔咁解。不过，呢句俗语嘅来历，家阵啲细路可能已经无法体会。
广州嘅冬天来得突然，南方人用棉被亦不过小半年。记得前几年每到呢个时候，小区嘅会所门口，就会有人摆个摊档来弹棉花。不过，呢几年呢个行当似乎慢慢走向衰微，广州嘅街头巷尾都好少见到。来弹棉花嘅，一般都系北方人。我细个阵时住喺乡下，每逢天冻就会有北方人来弹棉花，师傅仲攞住啲原始嘅工具，包括弯弓、棉花锤，就好似弹琴咁，“蹦蹦蹦蹦”节奏感强，响个唔停。
到咗呢几年，弹棉花喺广州已经少见咗，偶尔仲喺啲小街小巷某间小店仔，有人临时租来做弹棉花，而且弹棉花嘅工艺亦改进咗，一般结合机器来弹，唔再用旧阵时啲架撑。呢个行业慢慢消失，估计原因有几个，一系床上用品市场选择多咗，街坊除咗棉被外，仲可以拣羽绒被之类；二来，用品更新换代亦快咗，有啲街坊棉被旧咗，就直接换新，唔想花心机攞去弹松再用。无论如何，弹棉花呢个行当，始终代表住节俭、环保，成咗一代人难以忘怀嘅记忆。
闻歌 媒体人
本文来源：信息时报
责任编辑：
王晓易_NE0011
