我爷爷奶奶的爱情故事

“乡音苑”故事选段

讲述者 姚女士

(来自江苏省张家港市，37岁）

我俚奶奶其实是个地主人家格小姐，等伊长大之后呢，就到上海去工作，做一个纺织厂格工人。乃末，日本人打中国格辰光呢，到上海格辰光，伊就逃出去了，乘了搿个轮船不晓得开到啥格地方。等到伊下了轮船之后，伊也不晓得应该到哪里去。当时辰光，轮船码头浪厢有一个人（编者注：即讲述者的“公公”，即爷爷）就担伊带转去了。带转去之后呢，准备寻伊做新妇格，但不过我的奶奶弗欢喜伊呀。当时我俚公公屋里厢穷来弗得了。人家好像是讲弟兄三个人只好穿一条裤子，我也弗晓得囔穿法子。

译：我的奶奶其实是个地主人家的小姐，长大之后去上海工作，在一个纺织厂做工人。日本打中国的时候，打到了上海，她就逃出去了，乘了一艘轮船不知道开到哪个地方。等她下了轮船之后，她也不知道该到哪里去。当时码头上有个人就把她带回家去了。带回去之后呢，打算讨她做媳妇。但是我奶奶不喜欢他。当时我爷爷家里穷得不得了。人家说弟兄三个穷得只能穿一条裤子，我也不知道怎么个穿法。

我俚公公欢喜伊，弗想担伊送了跑，就同伊讲，个末汝歇脱两天，让我田里厢生活不大忙了，我再送汝跑。好格，伊歇脱两天先。再歇脱两天呢，（我俚公公）讲我还有点生活朆做好，还是弗好送汝跑。 搿个样子辰光长了之后呢，我俚奶奶就蹲勒浪留下来了，乃两个人就结婚了。

译：我爷爷喜欢她（我奶奶），不想送她走，就跟她说，那么你先等两天，等我地里的活不大忙了，我就送你走。好了，她先等两天。再等了两天呢，（我爷爷）说还有些活没干好，还是不好送你。就这样，日子长了之后，我奶奶就留了下来，两个人就结婚了。

结了婚之后，我听我俚奶奶讲，过了好几年伊俚个阿哥勒上海格，就开始要寻伊。伊想伊俚妹妹当年逃到哪里去特。我俚奶奶听别人家讲，伊俚阿哥勒寻伊，乃伊就请伊隔壁头会写字格人写了一封信寄到上海。寄到上海之后呢，伊俚阿哥收着搿封信就带了交关人，来接伊俚妹妹。当时辰光我俚奶奶已经养了两个小倌格特。乃伊弗肯回上海，也弗肯回吕四（编者注：属江苏启东）。伊讲我已蹲勒浪结婚，有小人格特。后来点，（伊俚阿哥）讲，个末你多少弗要回老家看一看啰？乃所以，搿些辰光，我俚公公奶奶带了小倌一道回到吕四格老家。

译：结了婚之后，我听我奶奶讲，过了几年，她的哥哥在上海的，就要开始找她。她哥哥想妹妹当年逃到哪里去了。我奶奶听说这件事，就请隔壁会写字的人写了一封信寄到上海。她的哥哥收到这封信，就带了许多人，来接他妹妹。当时我奶奶已经生养了两个小孩了。这样她就不愿意回上海，也不愿意回吕四老家。她说，我已经在这里结婚，有了小孩。后来，（她哥哥）说，那么你不管怎样也要回老家看一看吧？于是，那个时候，我爷爷和我奶奶带着孩子一起回了吕四的老家。

因为毕竟当时伊俚还是地主人家，我俚奶奶格阿哥当时做汉奸，还是蛮多钞票格。乃末，去了之后， 吃格、用格、着格，带了交关转来。当时我俚公公讲扁担挑断脱好几条嘞。我俚公公还讲起过一个蛮滑稽的情况，伊讲，当时伊俚阿哥带了人来寻我俚奶奶格辰光，伊俚是想看看我俚奶奶嫁辖囔样子格人。我俚公公晓得来看伊，觉着，嗯，我长得蛮好看格，个有哈看头势啊。后来，我俚奶奶回到吕四老家格辰光，人家就同伊讲，你弗要转去了，有哈好转去啦，搿人家穷末穷得来。我俚奶奶讲，弗来事呀，我已经有小倌格呀。

译：因为毕竟当时我奶奶家还是地主人家，而且我奶奶的哥哥当时做汉奸，还是蛮有钱的。去了之后，带了许多吃的、用的、穿的回来。当时我爷爷说挑断了几根扁担。我爷爷还讲过一个蛮好笑的事，他说，当时奶奶的哥哥带人来寻我奶奶的时候，想看下我奶奶嫁了个怎样的人。我爷爷知道来看他，觉得自己长得蛮好看的，这有啥好看的。后来，我奶奶回到吕四老家，别人跟她说，你不要回去了，有啥好回的，那家人家太穷了。我奶奶说，不行呀，我已经有小孩了呀。

后来点，我俚公公讲，我俚奶奶年纪轻格辰光长得漂亮，弗得了格漂亮。搿些辰光伊已经拖身格特，肚皮里有小倌格特。但不过隔壁头啊，弗懂隔壁哪里格人，要来抢伊，抢伊转去做娘子。当时，我俚奶奶勒田里厢，就吓来躲勒田里厢。我俚公公末也弗敢发声音，就朆拨人家抢了跑。差弗多伊特两个人结婚六十年，虽然我俚妈妈老是讲，我俚奶奶这个人弗好，懒得来，啥个啥个听。但不过，我觉着两个人六十年格夫妻做下来，蛮开心格。

译：后来，我爷爷说，我奶奶年轻的时候漂亮得不得了。那时候她已经有孕在身，隔壁不知道哪里的人，要来抢她做老婆。当时我奶奶在田里，吓得躲在田里，我爷爷也不敢出声，最后就没被人抢走。两个人结婚差不多60年，虽然我妈妈老是说我奶奶不好，很懒，什么什么的。但是，我觉得两个人60年的夫妻做下来，蛮开心的。

（本篇故事据“乡音苑”音频及文字直录整理而成）