广东
「樂壇校長」譚詠麟8月23日度過「25歲半」生日，同步為9月「刻骨銘心」演唱會尖沙咀快閃店揭幕。為演唱會減重近17磅的他，接受《星島頭條》訪問時透露私下熱衷玩新興「摜蛋」牌局。校長更罕有大方回應兒子譚曉風的感情狀況，透露已多次見過兒子的女朋友並大讚「幾好」，展現出永遠年輕的潮爆心態與開明作風。
譚詠麟近日現身快閃店揭幕。（weibo@譚詠麟AlanTam）
譚詠麟自揭為騷減重17磅
譚詠麟訪問時表示最近已有十分朋友與他慶祝生日：「有宴會，有飯局又有蛋糕，所以今日靜靜同朋友喺屋企撐枱腳，打牌。」特別一提，譚詠麟所說的「打牌」指的是「摜蛋」，可謂十分潮流。演唱會將近，譚詠麟也消瘦不少，他透露自己減了將近17磅：「但係啲人鬧，咁就食返幾磅啦，其實我仲爭4，5磅。」有記者問到譚詠麟兒子譚曉風有沒有返港？他極速回答：「多謝。」揭幕禮中，譚詠麟也親手收到不少禮物和利市，他表示要留待之後日子「一次過拆」，笑言收利市一定要親手接：「不假手於人。」
（weibo@譚詠麟AlanTam）
譚詠麟罕談兒子感情大讚未來新抱
譚詠麟談及生日願望：「演唱會有個主題，都係希望世界和平，大家環保，好多天災、人禍都影響咗環境生態，都係演唱會帶出嚟訊息。」對個人願望校長則保持神秘感：「我自己嘅生日願望呢，就係……多謝大家關心，唔會講畀你聽。」
當被追問兒子譚曉風的感情狀況及是否有意「抱孫」時，校長難得鬆口透露：「邊有咁快呀。（想唔想？）都未結婚，邊有咁快。（有女朋友？）梗係有啦。（見過？）見過，經常見。（係咪外國人？）多謝關心。（滿唔滿意未來新抱？）幾好。（香港定外國人？）同音樂一樣無國界。（未來新抱好靚？）都唔關我事，多謝啦。（會唔會返嚟睇騷？）多謝關心，我都唔知佢睇邊場。」
譚詠麟罕談兒子感情。（weibo@譚詠麟AlanTam）
譚詠麟呼籲歌迷不要買黃牛
此外，面對演唱會門票被黃牛炒至過萬元的「韓星價」，校長特別呼籲歌迷：「大家千祈唔好買黃牛，出面啲黃牛好畀面，將我擺咗喺啲韓星價錢嗰度。（萬幾蚊一張）係囉，千祈唔好益啲黃牛。」又笑言可以在門口聽演唱會：「外圍攻擊！」有關玻璃屋快閃店的產品，譚詠麟特別提到當中可以聊天的「I-Allen」，他說：「有個嘢我好鍾意，係AI做嘅，係我把聲，入晒我嘅資料，差唔多係識問識答，係我把聲。」及後譚詠麟同「I-Allen」合照時，工作人員嘗試與之對話，怎料「I-Allen」用譚詠麟的聲音回答：「你唔好咁大火氣。」相當搞笑。
呼籲樂迷切勿買黃牛。（weibo@譚詠麟AlanTam）
特别声明：以上内容(如有图片或视频亦包括在内)为自媒体平台“网易号”用户上传并发布，本平台仅提供信息存储服务。
Notice: The content above (including the pictures and videos if any) is uploaded and posted by a user of NetEase Hao, which is a social media platform and only provides information storage services.
