TVB“细细粒瘦身成功华丽变身！通过媒体正式发起征婚

王祖蓝点解阻止拍纤体广告 细细粒想透《明周》徵婚│封面故事

现年三十九岁的“细细粒”陈嘉佳，由二三年八月开始减肥，经过一年零八个月，五月二十九日踏入四十岁的她，终于穿上真正的泳衣拍下成果。

这趟减肥之旅，“细细粒”受到大家重新关注，然而，减肥后的她并没有变了模特儿身材，但彻彻底底重拾健康和自信，并希望大家记起她的演员身份，发掘她更多的可塑性，四十岁，准备重启第二人生。

为了解自己的肥因，细细粒都研究了一段时间，“我减到开始怀疑人生，有日同阿妈倾偈，我问佢其实我係咪真係由细已经咁大食？阿妈话我六个月大，可以食到三碗皮蛋瘦肉粥，两岁去饮茶，一个人食晒一个白色陶瓷碗嘅凤爪排骨饭，仲要将同枱uncle嗰啲凤爪排骨都食埋，阿妈仲记得我六岁，煮饭煎鸡翼，嗰时一磅鸡翼应该有十五隻左右，佢就要买一磅半至两磅先够我食，原来我由细到大都未试过肚饿，我依家都会食，不过我识得饱喇终于，唔识饿同唔识饱係一个好严重问题。”

今年二月，细细粒出席卫诗雅的婚礼，一到场大批传媒便譁然！连容祖儿见到她都忍唔住话︰“哗！你瘦咗好多呀！”当时本刊记者被安排与她同枱，整晚细细粒都真係乜都食少少，“嗰阵係再瘦啲，一百三十八磅左右，但睇起上嚟个样好恶，唔锺意，依家咁我觉得ok。”

王祖蓝点解阻止拍纤体广告

细细粒续说︰“而家四十岁，又未结婚、又冇小朋友，我觉得自己仲有体力，身体又健康返，所以其实我想拍番嘢，咁多年大家仲係记得我‘Vivienne’呢个角色，点讲呢？其实入行咁耐，我拍戏嘅日子真係唔多，真真正正拍戏都係拍咗三、四年，你问我依家瘦咗啦，可能肥我都未想会继续去拍嘢住，因为都係延续于一个搞笑嘅角色，只不过由三十岁嘅搞笑肥妹，变咗四十岁搞笑中女，我想拍啲认真演戏嘅角色，其实十年前我都有一个机会……”

细细粒加入无綫第二年，拍下《老表，你好嘢！》和《My盛Lady》后就很快“入屋”，那时坊间仍然流行很多纤体广告，当时张玉珊亦亲自出面邀请细细粒减肥，“我想减㗎，由细到大都想瘦，嗰阵时张玉珊同我讲会帮我减到一百二十磅，仲有七位数字代言，係呀！好吸引！嗰时我先廿九岁，我记得我哋第一次见面喺半岛coffee shop，之后上咗尖沙咀嘅纤体公司，见晒佢哋成个团队，我谂有十几个营养师，过程係好愉快好开心，心谂，哗！

拍完电视剧之后，即刻可以减肥成功，我记得我同张小姐嗰阵仲开咗个条件，我话我想拍套电影，好似《瘦身男女2》由肥到瘦都要我自己演，张小姐竟然都答应咗，咁点解到最后唔成事呢？因为我入行经过所有嘢都係多得祖蓝，见完张小姐之后，我同祖蓝倾，祖蓝係reject叫我唔好减，祖蓝同我讲，‘细细粒’仲可以带俾你好多想像唔到嘅嘢，佢话我可以选择转型，但未必係呢个时候，咁的确，之后嘅‘细细粒’带俾我好多嘢，呢个名到依家都十年啦，带俾我嘅收入都肯定多过七位数字。”

“《明周》可唔可以徵婚㗎？”

细细粒是首批在内地做直播的艺人，亦是少数仍然在直播圈能够生存的艺人，她坦言，并不是大家看到的简单容易，“唔係大家想像得咁好，如果唔係，个个都去做啦，真真正正艺人走去做直播其实好少，你要遇到一个好嘅团队、好嘅公司，先集合到一啲好嘅产品，仲可以俾你拣，一开始我係因为遇上疫情，个个都留喺屋企，好需要食物，我遇上一个好好嘅机会，咁后期咁多人做直播，个个都卖，我做咩要买你那些？

咁係因为做过一啲好漂亮嘅盈利，我初时嘅盈利真係好少，讲紧搵几万蚊一个月，去到后期真係储咗一堆客，咁人哋会认住你个样你个名，每年买大闸蟹都係搵你、买榴槤又搵你囉，呢三年嘅食播，係食到真係有少少健康问题。

第一次做嗰个body check係几恐怖，唔敢同阿妈讲，嗰阵时买完药都唔够胆攞返屋企，因为我每次飞返香港，都要配半年至一年药，一大袋呀，每次配药都要两万八到三万蚊，我係将袋药摆喺超市胶袋，返到屋企即刻摆落个行李箱入面，阿妈一直都唔知，但依家健康返佢都放心嘅。”

以前细细粒减肥或多或少都希望拍吓拖，不过到现在仍然未有声气，妈妈亦没有再提想她有下一代，“我肯定仲生到嘅，哈哈！不过连一个伴侣都未有，阿妈都唔问喇，佢唔係好识得享福嘅人，锺意过返以前嘅生活，我好辛苦先劝咗佢搬，但係佢都係锺意过住节衣缩食嘅生活，我觉得唔需要逼佢，拍拖……喂！

《明周》可唔可以徵婚㗎？唔好呃钱嗰啲，我好聪明㗎，如果真係想识我，又冇乜门路，咁就不如联络吓《明周》，大家当做个朋友囉！我讲真㗎，有乜所谓！”