KOL爆料老婆曾与吴若希老公拍拖被介入

早前吴若希Jinny出post公审老公何兆鸿（Alex）接送女同事，再度被网民指佢系恶妻，更有人留言暗示吴若希系第三者，Jinny当堂着火要老公澄清。估唔到话题仲未完，人称「富贵KOL」嘅 Sean Lam日前开直播爆料，大爆老婆Toby Sin原来多年前同过Alex一齐，更直指吴若希介入二人关系，Toby却反而被人屈系第三者。

声言要封咪嘅Sean Lam喺直播度话要讲最后一单娱乐圈事件，佢话因为有吴若希fans不时闹Toby系吴若希同Alex之间嘅第三者，而Sean Lam就以当年内情反击。首先Sean指Toby同Alex交往期间曾共度情人节，Alex仲送咗99枝玫瑰俾Toby，Sean仲话吴若希都收到Alex嘅花，但只系得18枝，可见地位不同。Sean Lam喺直播中，播放吴若希喺主持节目《姊妹淘》中，讲到试过因为收花而发现自己成为第三者。

后来Toby亦加入直播还原嗰个情人节发生嘅事。Toby提到Alex系为咗挽留Toby而约女友喺屋企锯扒庆祝，好有诚意。Toby指当时应约系因为Alex同佢讲已经同Jinny斩咗缆，而Alex亦叫Toby畀多次机会大家﹐仲讲到将来行先，又话会改咗啲坏习惯。Toby话当晚食完饭Alex多次叫佢留低过夜，不过俾佢拒绝咗，Alex就揸车送Toby返屋企。

其后Alex喺社交平台向发表吴若希「爱的宣言」，当中Alex更加话当Toby系「鸡」！Toby 直言对于个post嘅内容好介意，认为清白受损同被欺凌。Toby忆述呢篇声明出现之后，佢收到传媒电话，仲有人打嚟警告佢唔好再讲咁多嘢。Toby话当时社会经验唔够唔识应对，仲将IG 变private。Toby直言Alex个post「唔系事实，我好X介意呢个声明」，随后又弹Alex拍拖时剩系挂住打机。

Sean 之后再爆Alex同Toby分手后，背住吴若希多次send讯息想约Toby，甚至同人讲Toby好冧佢。感情瓜葛以外，Sean又踢爆Alex去朋友嘅赌场耍乐，但系以类似赊数方式找数，结果喺澳门有钱债纠纷，甚至被告上法庭。直播中Sean展示一单民事及劳动上诉文件，上面有位上诉人何兆鸿同Alex同名，但被裁定上诉理由不成立。